Dungan sa selebrasyon sa Pride Month, gipahigayon sa Department of Health Northern Mindanao kagahapong adlawa ang Himsog Health Forum nga naghisgut sa mahinungdanong updates may kalambigitan sa prevention ug treatment sa mga indibidwal nga natapnan sa sakit nga HIV/AIDS.
Sumala pa ni Dr. Ronald Romano gikan sa City Health Office nga ning kasamtangan, mokabat na sa 18 ka mga HIV Treatment Facility ang natukod sa tibuok Northern Mindanao.
Mahinungdanon kini aron nga mahimong accessible sa mga indibidwal ang mga serbisyo aron nga sila maka-pangayo og tabang, makapa-test makapakonsulta ug makapatambal kung sila adunay taas nga risgo nga matapnan sa nahisgutang sakit.
Dugang pa ni Dr Romano, walay angay nga ikahadlok ug ikabalaka ang buot magpakonsulta tungod kay libre kini sa tanan ug hugot nilang ginapatuman ang confidentiality sa matag HIV case subay na sab sa mga balaud sa Pilipinas.
Padayon sab nilang ginapatuman ang mga prevention strategies aron nga mapugngan ang pagdugang sa ihap sa mga natapnan sa HIV dinhi sa rehiyon. Lakip na diha ang pag-awhag sa saktong paggamit og condoms, paghatag og pre-exposure prophylaxis kon prep, paghatag og risk reduction counseling ug komprehensibong sex education.
Photo courtesy: DOH X/ Facebook
