Tun-an sa dakbayan sa Cagayan de Oro ang hangyo sa mga drayber sa bao-bao nga mahatagan og ruta aron makapamasada sulod sa dakbayan. Matod ni Janboy Actub, tigpamaba ni Mayor Kalrex Uy, wala nila walaa ang posibilidad nga tugotan ang mga bao-bao nga makapamasada, apan adunay mga kinahanglanong proseso nga angay unang tutukan.
Gipasabot ni Actub nga dili sayon ang paglegal sa operasyon sa mga bao-bao tungod kay wala pa kini hatagi og prangkisa ug wala usab marehistro alang sa matang sa serbisyo. Dugang pa niya, adunay mga babag nga kinahanglan sulbaron, ilabina sa mga regulasyon nga sakop sa Land Transportation Office o LTO ug Land Transportation Franchising and Regulatory Board o LTFRB.
Bisan pa niini, nagpabilin nga bukas ang posibilidad nga mahatagan og higayon ang mga bao-bao nga makapamasada, basta matuman nila ang mga batakang kinahanglanon ug masunod ang mga lagda sa transportasyon. Sa pagkakaron, magdepende pa sa pagtuon ug pagtuman sa mga kinahanglanong regulasyon ang posibilidad nga makahatag og legal nga ruta alang sa mga bao-bao sa Cagayan de Oro.
Photo courtesy: Roads and Traffic Administration 2.0
