Napuhag sa hiniusang operasyon sa Philippine Drug Enforcement Agency o PDEA-10 ug kapulisan ang usa ka gidudahang drug den sa Adelaida Park Residences, Barangay Balulang, Cagayan de Oro City, diin lima ka mga suspek ang nadakpan, lakip ang usa ka opisyal sa Bureau of Customs o BOC.
Gipahigayon ang buy-bust operation sa mga operatiba sa PDEA-10 Misamis Oriental Provincial Office, Cagayan de Oro City Police Office, Police Station 4 ug 1001st Regional Mobile Force Battalion.
Giila ang mga nadakpan sa mga alyas nga “Drew,” 39 anyos, ug “Cha,” 37 anyos, nga giingong kaubang tag-iya ug tigdumala sa maong drug den. Nadakpan usab ang mga alyas nga “Al,” 57 anyos, ug “Adi,” 41 anyos, nga mga residente sa Looc, Plaridel, Misamis Occidental, ingon man ang alyas nga “Ton,” 38 anyos, residente sa Mandaue City, Cebu ug usa ka opisyal sa Bureau of Customs.
Nakumpieka gikan sa mga suspek ang duha ka sachet sa gidudahang shabu nga motimbang og mga lima ka gramo ug nagkantidad og gibanabanang P34,000.
Nabawi usab sa operasyon ang usa ka Glock 21 kalibre .45 nga pistola nga adunay 13 ka bala, usa ka Bersa Thunder kalibre .380 nga pistola nga adunay 15 ka bala, usa ka Toyota Vios, cellphone, eyeglass case, mga drug paraphernalia ug buy-bust money.
Atubangon sa mga suspek ang mga kasong may kalabotan sa posibleng paglapas sa Sections 5, 6, 7, 11, 12 ug 15 sa Republic Act 9165 o Comprehensive Dangerous Drugs Act of 2002, ug Republic Act 10591 o Comprehensive Firearms and Ammunition Regulation Act.
Gipasalig sa mga otoridad nga magpadayon ang ilang mga operasyon batok sa ilegal nga droga ug giawhag ang publiko nga motaho sa mga kalihokan nga may kalabotan niini ngadto sa pinakaduol nga opisina sa PDEA o kapulisan.
Photo courtesy: PDEA DYES
