Malaumon si Department of Information and Communications Technology (DICT) Secretary Henry Aguda nga magpadayon ug mas mapalambo pa ang mga digital connectivity projects sa gobyerno bisan pa adunay mahimong kausaban sa administrasyon sa umaabot.
Matod ni Aguda, lisod nang tangtangon o undangon ang mga programa sama sa National Fiber Backbone ilabina kung naa nay Barangay Connectivity Program tungod kay daghan nang katawhan ug komunidad ang nakapahimulos niini.
Giingon sa kalihim nga kung makita sa publiko ang kaayohan sa mas paspas ug mas lig-on nga internet connection, mas dako ang posibilidad nga ipadayon ug pausbawon pa kini kaysa wagtangon.
Dugang pa niya, ang tumong sa DICT mao ang paghatag og mas maayong digital infrastructure aron mas mapadali ang serbisyo sa gobyerno, edukasyon, negosyo ug komunikasyon sa tanang bahin sa nasud.
Busa, naglaom ang ahensya nga ang mga digital projects sa gobyerno mahimong lig-on nga pundasyon alang sa padayon nga kalamboan sa teknolohiya ug konektibidad sa Pilipinas.
Photo courtesy: DICT Secretary Henry Aguda/ Facebook
