Nadiskubrehan ang Mindanao caecilian, usa ka matang sa amphibian nga makita lamang sa Mindanao, sa Biodiversity Monitoring System Site sa Mount Apo Natural Park, Probinsya sa Cotabato.
Giila kini ni Marisol G. Pedregosa, wildlife biologist sa Energy Development Corporation, ug gikumpirma ni Arvin Diesmos, direktor sa National Museum of Natural History.
Sumala sa Department of Environment and Natural Resources (DENR), ang maong hayop walay mga tiil ug susama sa ulod o gamayng bitin, apan dili makahilo o makadaot sa tawo. Giila kini isip Other Threatened Species ubos sa DENR Administrative Order No. 2019-09.
Gipasiugda sa DENR nga importante ang maong pagkarekord sa pagmonitor sa biodiversity sa Mount Apo Natural Park ug giawhag ang publiko nga dili patyon ang mga hayop nga wala mailhi, kondili mangayo og tabang sa mga eksperto aron mailhan kini sa hustong paagi.
Photo courtesy: DENR Soccsksargen
