Nagpadala og dugang pwersa ang Bureau of Fire Protection (BFP) Bukidnon ngadto sa General Santos City ug lalawigan sa Sarangani aron motabang sa nagpadayong search, rescue, ug retrieval operations human sa kusog nga linog nga miigo sa maong mga dapit.
Gibutyag ni SF02 Rene Rubillos, Operations Chief sa BFP – Bukidnon nga moabot na sa napulo ka mga personnel ang ilang gipadala isip augmentation team. Unang gipakatap ang walo ka miyembro, samtang laing duha ang gidugang sa pagkasunod nga adlaw. Gikumpirma usab sa opisyal nga nakatabang na ang maong mga gipadalang personnel sa pagrekober sa pipila ka mga biktima nga natabunan sa mga nahugno nga estruktura tungod sa linog.
Aron masiguro ang padayon ug epektibong operasyon sa disaster area, nag-andam na usab ang BFP Region 10 og laing team nga maoy mopuli sa mga responders nga dugay nang nagtrabaho didto.
Bisan pa man og layo ang Bukidnon sa lugar nga naigo sa kalamidad, gipasabot sa BFP nga kabahin sa ilang mandato ang paghatag og dinaliang tabang sa bisan asang dapit sa nasod nga nanginahanglan sa ilang serbisyo ug kahanas sa pagtubag sa kalamidad.
Photo Courtesy: BFP -Bukidnon
