Gihingusgan sa Lokal nga kagamhanan sa Valencia City, ang lakang ug pakigbatok sa Hepatitis A human nakatala og kumpirmadong mga kaso sa duha ka barangay pinaagi sa subsob nga gipahigayong case investigation, sanitation inspection, ug monitoring sa Health Office (CHO) sa dakbayan.
Kini human sa gipagawas nga opisyal nga rekord sa CHO as of Oktubre 13, 2026 diin miabot sa kapin 138 ka patient records ang gipailalom sa pagbantay. Sa maong ihap, 31 ang kumpirmadong positibo sa Hepatitis A—diin 26 niini naggikan sa Barangay Lurugan samtang lima usab sa Barangay San Carlos. Aduna usab gitala nga 59 ka suspected cases ug 48 nga nag-negatibo sa eksaminasyon.
Aron mapugngan ang pagkatap sa virus nga kasagaran makuha sa kontaminadong pagkaon ug tubig, gikasa sa Environmental Sanitation section ang inspeksyon sa mga food establishments ug vendors, samtang nagpahigayon usab og water quality testing sa mga tunghaan ug kabalayan diin napamatud-ang luwas ug nahisubay sa microbiological standards ang katubigan sa Lurugan.
Gipahinumdoman sa mga awtoridad ang publiko nga kanunayng manghugas sa kamot, moinom sa luwas nga tubig, ug gilayon nga makig-alayon sa doktor kung makasinati na og mga simtomas sa maong sakit.
Photo courtesy: CHO – Valencia City
