Kapin sa 100,000 ka buhing exotic nga uk-ok ang nakumpiska sa mga awtoridad sa Australia sa giingong pinakadakong pagsakmit sa mga iligal nga invertebrates sa kasaysayan sa nasod.
Ang operasyon gihimo sa Bathurst diin narekober ang nagkalain-laing espesye lakip ang Madagascar hissing cockroach ug Dubia cockroach. Gibanabana nga mokabat sa 200,000 Australian dollars ang kantidad sa mga nakumpiskang insekto.
Sumala sa mga opisyal, gidili sa Australia ang pag-import, pagtipig, pagpadaghan ug pagbaligya sa maong mga espesye tungod sa posibleng hulga niini sa biosecurity ug sa lokal nga kalikupan.
Matod pa sa mga awtoridad, wala pa hingpit nga nasusi ang mahimong epekto sa maong mga uk-ok sa palibot ug adunay kabalaka nga mahimo silang makapakaylap og sakit o makadaot sa lokal nga wildlife.
Gituohan nga ang mga insekto gitipigan isip pagkaon sa mga reptilya tungod sa ilang kadako ug nutritional value. Apan giawhag sa gobyerno ang mga tag-iya sa mga binuhi nga mogamit na lamang og alternatibong mga feeder insects sama sa mga cricket ug wood roaches.
Sa pagkakaron, wala pa’y kaso nga gisang-at batok sa breeder nga nalambigit sa maong operasyon. Gipaabot usab sa mga opisyal nga patyon ang tanang nakumpiskang uk-ok isip kabahin sa mga lakang sa biosecurity
Photo Courtesy: anews
