Usa ka 67-anyos nga babaye gikan sa China ang nakakaplag og bag-ong paglaom human ang usa ka follow-up nga eksaminasyon nagpakita nga mikunhod ang gidak-on sa iyang tumor pipila ka semana human niya natuman ang iyang damgo nga mobiyahe paingon sa Antarctica.
Si Wang Ying, usa ka amateur nga wildlife photographer gikan sa probinsya sa Yunnan, nadayagnos nga adunay matang sa kanser sa thyroid. Gitambagan siya sa mga doktor nga magpa-opera dayon.
Tungod sa kakurat sa maong dayagnosis, nakahukom si Wang nga unahon una ang pagtuman sa iyang dugay na nga damgo nga mobisita sa Antarctica aron mokuha og mga litrato sa mga penguin.
Migasto siya og 150,000 yuan mokabat sa $22,000 alang sa maong ekspedisyon nga milungtad og usa ka bulan; tungod kay milapas ang gasto sa iyang tinigom, gitabangan siya sa iyang inahan sa pagbayad sa nahabilin nga kantidad.
Usa sa iyang paborito nga mga kuha mao ang litrato sa usa ka inahan nga penguin nga nagpakaon sa iyang piso. Bisan pa sa temperatura nga miubos ngadto sa minus 10 degrees Celsius, uban sa kusog nga hangin ug pag-ulan sa niyebe, naghulat si Wang sa gawas hangtod nga nakuha niya ang talan-awon nga dugay na niyang gitinguha.
Pagbalik niya gikan sa Antarctica, nagpa-eksamin siya pag-usab sa medikal. Nadiskobrehan sa mga doktor nga mikunhod ang gidak-on sa iyang tumor kon itandi sa scan nga gihimo sa wala pa ang iyang biyahe. Tungod niini, giingnan siya nga dili na kinahanglan ang dinaliang operasyon, bisan pa man nga ang iyang kondisyon nagkinahanglan gihapon og regular nga pag-monitor.
Kini nga resulta nakapausab sa panglantaw ni Wang sa kinabuhi ug nakapalig-on sa iyang determinasyon nga ipadayon ang iyang gugma sa wildlife photography.
Sa misunod nga mga tuig, nakabiyahe na siya sa kapin sa 30 ka mga nasod. Nakakuha usab siya og mga litrato sa kapin sa 1,200 ka matang sa mga langgam.
Matod ni Wang, nakakat-on siya sa mas maayong pagdawat sa mga wala damha nga panghitabo sa kinabuhi ug dili tugotan ang gagmay nga mga problema nga makaapekto pag-ayo kaniya.
PHOTO COURTESY: PEP
