Gidakop ang usa ka 21-anyos nga motorista human giingong nagdumili sa paghunong sa police checkpoint ug misukol sa usa ka pulis didto sa Alberto Q. Obay Road, Barangay Miputak, Dipolog City, niadtong nakalabay nga adlaw.
Sumala sa inisyal nga taho sa kapulisan, nakadawat og tawag sa radio ang Dipolog City Police Station gikan sa mga personnel sa Punta Fixed Checkpoint bahin sa maong motorista nga giingong wala mohunong alang sa beripikasyon ug inspeksiyon.
Gipahunong sa niresponde nga pulis ang motorista sa Alberto Q. Obay Road, apan giingong misukol kini atol sa pagdakop, nga miresulta sa pisikal nga komprontasyon ug pagkasamad sa bukton sa moang pulis. Gidala ang motorista sa Dipolog CPS alang sa dokumentasyon ug imbestigasyon.
Gipahamtangan usab ang motorista og citation ticket tungod sa mga nalista nga paglapas sa trapiko, lakip ang pagdrayb nga walay lisensiya, arrogant behavior, pagbalibad sa pagpirma sa citation ticket ug giimpound usab ang motorsiklo niini.
Samtang gihimo na usab ang dugang nga imbestigasyon ug pagtino sa angay nga mga kaso, base sa mga ebidensiya.
Giawhag usab sa Zamboanga del Norte Police Provincial Office ang mga motorista nga mosunod sa legal nga pamaagi sa checkpoint ug makigtambayayong sa kapulisan alang sa kaluwasan sa kadalanan ug kahapsay sa komunidad.
Photo courtesy: Adobe Stock
