Gikumpirma sa Main Directorate of Intelligence sa Ukraine ang pagkamatay sa laing Pilipino nga giingong nakig-away alang sa pwersa sa Russia sa gubat batok sa Ukraine. Ang maong Pilipino giila nga si Sabtar Sabanal Malambahe, lumad sa Labason, Zamboanga del Norte.
Sumala sa mga dokumentong gipagawas sa publiko, mipirma si Malambahe og kontrata sa militar sa Russia niadtong Hunyo 16, 2026. Sa unang bahin sa Hulyo, giingong gipadala siya sa front line diin siya namatay atol sa usa ka enkwentro duol sa Kostiantynivka, Donetsk Oblast.
Gipadayag usab sa report nga ang mga litrato nga giingong narekober gikan sa namatay, diin makita siya kauban ang laing lalaki nga gidudahang Pilipino usab. Apan, wala pa makumpirma ang pagkatawo sa maong lalaki ug ang kahimtang niini.
Tungod sa maong kumpirmasyon, misaka na sa lima ang ihap sa mga Pilipinong gikumpirma nga namatay samtang nakig-away alang sa pwersa sa Russia.
Photo courtesy: Головне управління розвідки Міністерства оборони України
