Subling gipasidan-an sa Bureau of Customs (BOC) ang publiko batok sa “love scams,” nunot sa nadawat nga kapin sa 700 ka reklamo sukad sa pagsugod sa tuig nga nag-aberids ug 70 matag buwan.
Namulong sa “Kapihan sa Manila Bay” forum, si Customs Commissioner Ariel Nepomuceno namatikdan nga ang pinakataas nga ihap sa mga reklamo natala niadtong Enero.
Matod niya, kasagaran sa mga nalambigit mao ang mga langyaw nga unang nakatukod og romantikong relasyon sa ilang mga biktima. Sa dihang nakuha na nila ang pagsalig sa biktima, ila dayong kombinsihon ang indibidwal nga padalhan sila og kuwarta.
Ang ilang modus kasagarang naglambigit sa langyaw nga nangangkon nga nagpadala og regalo sa biktima, unya nangayo og kuwarta aron mabayran ang gasto sa pagpadala o ang paghatod sa parcel.
Ang hepe sa adwana mitambag nga kon ang usa ka romantikong kapikas mangayo ug kuwarta, ang usa kinahanglang maghunahuna ug makaduha gawas kon ang relasyon dugay na.
Giawhag usab sa ahensya ang publiko sa pagpangayo og mga resibo ug mga detalye sa pagsubay sa pakete, ug pag-verify sa BOC kon tinuod ba nga gipadala kanila ang usa ka package.
Photo Courtesy: GARP
