Nadakpan na sa operasyon sa CIDG 12-Sarangani Provincial Field Unit ug mga kaubang ahensya ang gidudahang gunman sa pagpamusil-patay sa negosyanteng si Renante “Ren” Tampus, sa purok Pandian, Barangay Labangal, General Santos City, ala una sa hapon, karong octobre 13, 2026.
Ang nadakpan mao si Lito Mediang Rehang, alyas Pito, 34 anyos, nga giila nga Top 10 Most Wanted Person sa rehiyonal nga lebel. Kauban sa operasyon ang RIU 12 PIT Sarangani, Police Station 1 sa GSCPO, 1st SPMFC, PIU SPPO, Malapatan MPS ug Sarangani Maritime Police Station.
Ang suspek nag-atubang og kasong murder ubos sa Article 248 sa Revised Penal Code, pinasikad sa warrant of arrest nga gipagawas sa Regional Trial Court niadtong Abril 8, 2025, nga walay girekomendar nga piyansa.
Nahinumdoman nga gipusil-patay si Tampus sulod sa iyang salon sa RD Plaza Mall, Barangay Dadiangas West, niadtong Enero 15, 2025. Base sa imbestigasyon, personal nga kasuko ug mga panagbangi kalabot sa negosyo ug pamuhunan ang gitan-aw nga motibo sa krimen.
Una nang nadakpan ang usa sa mga giingong lookout nga nakatabang sa pag-ila sa ubang mga suspek.
Photo courtesy: CIDG 12, Sarangani PFU
