Napalgan na sa kapulisan ang pick-up truck nga gigamit sa pagpanulis sa Sitio Miranda, Barangay Damilag, samtang aduna nay giila nga pipila ka “Persons of Interest” (POIs) dungan sa nagpadayong hot pursuit operations sa Police Regional Office 10 (PRO10) batok sa mga suspetsado.
Nakit-an nga gibiyaan sa mga suspetsado ang usa ka itom nga Ford Ranger Wildtruck, nga gituohang getaway vehicle sa mga tulisan didto sa Barangay Alae, Manolo Fortich, duol sa Alae–Tagoloan Bypass Road, sa may alas-5 sa hapon kagahapon Hunyo 18.
Dali kining giproseso sa mga personahe sa Scene of the Crime Operatives (SOCO) aron makakuha og mga ebidensya ug fingerprints pinaagi sa forensic examination. Sa pikas bahin, ang pag-ila sa mga POIs nakab-ot pinaagi sa gipaspasan nga intelligence coordination ubos sa gipatuman nga “OPLAN S.H.I.E.L.D.”
Padayon karon ang gihimong dragnet operations sa kapulisan aron hingpit nga madakpan ang mga mga suspetsado.
Nanawagan usab ang PRO10 sa publiko nga adunay bisan unsang impormasyon nga makig-alayon kanila aron daling masulbad ang maong krimen ug mahatagan sa hustisya ang mga biktima sa maong tulis diin mikabat 1.5 milyones pesos nasakmit sa mga suspetsado niadtong Hunyo 17, 2026.
Photo Courtesy: PNP – 10
