Gihingusgan sa Digos City District Jail Male Dormitory ang pagpatuman sa Katatagan, Kalusugan at Damayan ng Komunidad o KKDK Program aron mapalig-on ang rehabilitasyon ug pagbag-o sa mga Persons Deprived of Liberty o PDL.
Gitumong sa programa ang pagpalambo sa disiplina, emosyonal nga kalig-on ug hustong pagdesisyon sa mga piniriso nga adunay kasaysayan sa paggamit og ilegal nga droga.
Naglangkob kini sa 24 ka learning modules, diin 18 ang alang sa mga PDL ug unom alang sa ilang pamilya. Gihatagan usab og pagtagad ang paglikay sa pagbalik sa paggamit og droga ug pagpasig-uli sa pagsalig sa pamilya.
Pinaagi niini, gitinguha sa BJMP nga maandam ang mga PDL sa ilang pagbalik sa katilingban ug pagkinabuhi nga layo sa ilegal nga droga.
