Opisyal nang ilusad ang PhilHealth GAMOT Program sa Zamboanga del Sur Medical Center sa umaabot Hunyo 24, 2026, adlaw’ng Miyerkules aron sa paghatag og libre nga tambal sa mga kwalipikadong miyembro.
Kini ang gipahibalo ni Local Health Insurance Officer Arnyl Corpuz sa Zamboanga del Sur Local Health Insurance Officer atol sa eksklusibo nga pakighinabi sa Juander Radyo News Team.
Segun ni Corpuz, ubos sa GAMOT Program, mahimong makadawat ang mga miyembro ug dependent og hangtod ₱20,000 matag usa nga kantidad sa tambal matag tuig alang sa nagkalain-laing sakit basi sa nakonsulta sa Yakap Doctor.
Dugang pa, aron makabenepisyo, kinahanglan nga mokonsulta una ang miyembro sa usa ka accredited YAKAP facility diin maghatag ang doktor og electronic nga reseta nga gamiton sa pagkuha sa tambal sa accredited yakap gamot pharmacies.
Gilauman nga pinaagi sa pagpatuman sa Yakap Gamot program sa Zamboanga del Sur, mas daghang residente ang makadawat og accessible ug abot-kayang serbisyo sa panglawas, ilabina na sa nanginahanglan ug maintenance medicines.
