Gipakusgan pa sa Zamboanga del Sur Maritime Police Station o ZDS MARPSTA ang ilang operasyon batok sa smuggling o illegal nga pagpayuhot sa mga kontrabandong produkto sa lalawigan sa Zamboanga del Sur.
Sa pakighinabi sa Juander Radyo Pagadian, gipatin-aw ni PCAPT Mardizon Perie, Chief sa ZDS MARPSTA, nga ilang gihugtan ang pagmonitor sa mga kadudahang kargamento og karong bag-o nakasakmit sila sa P2.3 Milyon nga kantidad sa smuggle nga sigarilyo.
Giangkon sa hepe nga dakong hagit sa ilang operasyon ang kalapad sa baybayon nga ilang gibantayan, hinungdan nga gipalig-on ang koordinasyon sa ubang law enforcement unit aron mas epektibong masumpo ang smuggling.
Samtang, giawhag sa opisyal ang publiko nga maghatag og impormasyon sa kapulisan, bahin sa mga kadudahang kalihokan sa ilang lugar aron makatabang sa pagdakop sa mga nalambigit sa iligal nga kalihukan.
