Gikoronahan sila Xian Immaculate Amit ug Bryce Clayton sa COLEGIO DE STO. TOMAS-RECOLETOS, INC. (CSTR) isip unang Mr. ug Miss Teen San Carlos City 2026 atol sa pageant niadtong Oktubre 25 sa City Auditorium.
Nalabaw ang duha sa walo ka pares nga nagrepresentar sa nagkalainlaing sekondaryang eskwelahan sa siyudad pinaagi sa ilang mga pasundayag sa nagkadaiyang bahin sa kompetisyon.
Nakuha usab ni Amit ang Best in Funwear, samtang si Clayton midaog sa Best in Production Number, Best in Urban Denim Street Wear ug Best in Funwear.
Samtang, sila Julie Vie Bula ug Aaron Ayag ang gikoronahan nga Mr. ug Miss Teen SCC Pintaflores, samtang sila Kristiano Angelo Lasco ug Thea Fame Tolcidas ang ginganlan nga Mr. ug Miss Teen SCC Tourism.
Sa Pintaflores Modern Dance Competition, The Mudrazz ang midala sa kampiyonato ug nakadaog usab sa Best in Choreography. Misunod ang 6th Street isip first runner-up, samtang second runner-up ang The Aces, nga midaog usab sa Best in Costume.
Kabahin ang pageant ug sayaw nga kompetisyon sa ika-34 nga Pintaflores Festival, nga nagpasiugda sa talento, pagkamamugnaon ug potensiyal sa kabatan-onan sa San Carlos City.
Photo courtesy: San Carlos City, Neg. Occ. -LGU Information Page
