Gisugdan na sa mga empleyado sa Tagum City Economic Enterprises Office ang pagpanglimpyo sa La Filipina Public Cemetery niadtong buntag sa Oktubre 24, 2026 isip pagpangandam sa umaabot nga pagsaulog sa Undas 2026.
Kabahin kini sa padayong paningkamot sa Lokal nga Panggamhanan sa nasangpit nga lugar nga masiguro ang kahinlo, kahapsay ug kaluwasan sa mga pampublikong sementeryo ning siyudad sa dili pa ang paghinumdom sa mga minatay sa Nobyembre 1 ug 2 ning tuig 2026.
Gitinguha sa lokal nga panggamhanan nga mahuman ang mga kalihokan sa pagpanglimpyo sa mga sementeryo sa dili pa moabot ang maong mga petsa aron maandam ang mga pasilidad sa pagdagsa sa mga tawo nga mobisita sa mga lubnganan sa ilang mga minahal sa kinabuhi.
Pinaagi niini, gilaoman nga mahimong mas limpyo, hapsay ug luwas ang mga sementeryo alang sa mga pamilyang motambong aron mag-ampo, maghalad og bulak ug maghinumdom sa ilang mga minahal nga namahulay na.
Photo Courtesy: City Government of Tagum
