Upat ka estudyante sa medisina sa North Eastern Mindanao State University (NEMSU) ang makadawat og pinansyal nga suporta aron mapadayon ang ilang pag-eskwela ug matuman ang pangandoy nga mahimong mga doktor.
Sumala sa gipahibalo, matag estudyante makadawat og ₱50,000 nga tuition allowance matag semestre isip tabang sa pagbayad sa matrikula ug uban pang panginahanglan sa ilang medikal nga edukasyon.
Ang upat ka benepisyaryo gipili sa NEMSU base sa ilang kahimtang sa pinansyal ug sa panginahanglan sa ilang mga pamilya. Gawas sa tuition allowance, gipondohan usab kaniadto ang ilang review alang sa National Medical Admission Test (NMAT), isip pagpangandam sa ilang pagsulod sa medical school.
Gipasiugda sa maong inisyatiba ang kamahinungdanon sa paghatag og oportunidad sa mga batan-on sa Surigao del Sur nga gustong mahimong doktor, ilabina kadtong gikan sa mga pamilyang naglisod sa pinansyal.
Gilaoman nga pinaagi sa padayon nga suporta ug paningkamot, ang upat ka estudyante makakompleto sa ilang pagtuon ug sa umaabot makaserbisyo sa mga Surigaonon isip mga doktor.
Photo courtesy: Cong. Romeo S. Momo Sr. Facebook page
