Gipahigayon ang opisyal nga turnover ceremony sa usa ka yunit sa Combined Corn Harvester ngadto sa mga mag-uuma sa Barangay Doña Carmen, Tagbina, Surigao del Sur
Ang maong makinarya gitunol ngadto sa mga miyembro sa MHIDUSDMA Corn Cluster aron mapadali, mapagaan, ug mapalambo ang ilang produksyon sa mais pinaagi sa modernong sistema sa pag-ani. Gilauman nga kining mekanisadong pamaagi makapaubos sa gasto sa labor ug makapataas sa kinatibuk-ang kita sa mga lokal nga mag-uuma komparar sa naandang manual nga pag-ani.
Gitambongan ang maong kalihokan sa mga opisyal sa kagamhanan lakip na sila si 2nd District Representative Alexander T. Pimentel, Mayor Glaiza Jane Polizon Lanete, mga sakop sa Sangguniang Bayan, mga opisyal sa barangay, ug ang mga kadagkoan sa MHIDUSDMA.
Kini nga inisyatiba gipundohan pinaagi sa pagtinabangay sa Department of Agriculture, sa nasudnong kagamhanan, ug sa lokal nga panggamhanan sa Tagbina isip kabahin sa programa ug pagsuporta sa sektor sa agrikultura.
Photo courtesy: Ambit Granado Untua Delacruz
