Nagpagawas og opisyal nga advisory ang City Agriculture Office sa dakbayan sa Gingoog alang sa tanang mag-uuma ug lumulupyo aron mangandam sa mga posibleng epekto sa phenomino nga El Niño. Subay sa Regional Seasonal Climate Outlook nga gipagawas sa PAGASA, gipahinumdoman ang publiko nga maghimo na og gikinahanglang mga lakang batok sa elongated nga hulaw ug posibleng kakulang sa suplay sa tubig.
Tungod niini, gipahimangnoan ang tanan nga magtipid ug gamiton sa sakto nga pamaagi ang tubig alang sa ilang mga pananom ug pang-adlaw-adlaw nga panginahanglan. Giawhag usab sa buhatan ang mga pamilya nga magpraktis og backyard gardening o container gardening aron makapatubo og kaugalingong utanon nga magsilbing tinubdan sa pagkaon sa matag panimalay bisan sa panahon sa pag-uga sa yuta.
Alang sa mga mag-uuma ug residente nga nanginahanglan og dugang giya sa sakto nga pamaagi sa pagpananom ug uban pang suporta gikan sa gobyerno, makig-alayon lang o mobisita sa City Agriculture Office sa Gingoog City aron mahatagan og angay nga tulumanon ug tabang teknikal.
Photo courtesy: City Agriculture Office – Gingoog City
