Gitapos ang 2026 Malaybalay City Inter-School League (MISL) Season 4 human sa kulbahinam ug masadyaong kompetisyon tali sa nagkalain-laing eskwelahan sa dakbayan atol sa Awarding Ceremony niaging Oktubre 24, 2026.
Nanguna sa maong torneyo ang Bukidnon National High School human makuha ang kampiyonato sa kategoryang Baseball, Football High School Boys, ug Volleyball High School Girls, samtang giangkon usab sa San Martin Agro-Industrial National High School ang kampeonato sa Softball. Sa natad sa arts ug paghimo og slogan, ang Bethel Baptist Academy ang misakmit sa kampeonato sa Slogan Making Contest.
Sa maong programa gidasig ni City Councilor Christopher Lambert Tortula ang mga batan-ong atleta nga kinahanglan adunay disiplina ug pagtuman sa balaod, dili lang sa natad sa sports kundili lakip na usab sa ilang kinabuhi ug kinaiya sa katilingban aron mahimong kaabag sa kalambuan, kahapsay, ug kalinaw sa siyudad.
Gawas sa panagtigi sa mga atleta, mipadangat sab sa iyang taas nga pagtahod ug pagdayeg si Councilor Tortula alang sa suporta sa mga ginikanan ug tulunghaan ug sa walay paglubad nga sakripisyo ug dedikasyon sa mga magtutudlo ug coaches nga naghatag og giya ug pagbansay sa mga batan-on bisan walay dugang bayad.
Nagbilin ang maong torneyo sa mahinungdanong pagtulun-an sa pagpatunhay sa maayong pamatasan, disiplina, ug kalipay sa pagdula taliwala sa kabatan-onan sa Malaybalay City.
Photo courtesy: LGU – Malaybalay City
