Gipahibalo sa Department of Trade and Industry o DTI-Zamboanga Sibugay Provincial Office ang tanang partisipante sa COCONsumer Run 2026 nga nagsugod na karong Oktubre 26 ang pag-claim sa ilang race bib ug opisyal nga event shirt. Ang pag-claim magpadayon hangtod Biyernes, Oktubre 30, 2026, alas dose sa udto.
Mahimo nga makuha sa mga partisipante ang ilang race bib ug event shirt sa Consumer Protection Division sa DTI-Zamboanga Sibugay Provincial Office, nga nahimutang sa Montebello Building, Poblacion, Ipil, Zamboanga Sibugay, atbang sa 168 Mega Commercial.
Samtang, nagkantidad og 200 pesos ang event shirt nga gidak-on XS hangtod Large, ug 220 pesos alang sa XL pataas. Giawhag sa DTI ang tanang partisipante nga mo-claim sa ilang mga gamit sulod sa gitakdang panahon aron malikayan ang pagdali ug kalisod sa katapusang adlaw. Gipasiugda usab nga importante ang race bib alang sa pag-ila sa mga runner atol sa maong kalihokan.
Ang COCONsumer Run 2026 ipahigayon karong Sabado, Oktubre 31, sa LGU-Ipil Municipal Grounds sa Taway, Ipil, Zamboanga Sibugay. Magsugod ang assembly ug warm-up alas 4:00 sa kaadlawon, nga adunay 5-kilometer ug 8-kilometer nga mga kategoriya.
