Gidayeg sa Zamboanga Sibugay Police Provincial Office o ZSBPPO ang mga personnel sa Ipil Municipal Police Station tungod sa ilang pagkaalerto ug paspas nga aksyon nga misangpot sa pagkadakop sa usa ka 35-anyos nga lalaki nga giingong nakapanag-iya og armas nga walay lisensya atol sa checkpoint operation sa Ipil, Zamboanga Sibugay.
Base sa report, gipahunong sa kapulisan ang suspek nga nagmaneho og motorsiklo nga walay helmet. Atol sa naandang pagsusi kalabot sa paglapas sa balaod-trapiko, namatikdan sa mga pulis ang usa ka kalibre .38 nga rebolber nga klarong nagawas sa tuo nga bahin sa hawak sa lalaki.
Sa dihang gipangayoan ang suspek og lisensya, rehistro ug mga permit nga nagtugot kaniya sa pagpanag-iya ug pagdala sa armas gawas sa iyang pinuy-anan, napakyas kini sa pagpakita og balidong mga dokumento. Tungod niini, gidakop siya sa kapulisan diha mismo sa lugar tungod sa giingong paglapas sa Republic Act 10591 o Comprehensive Firearms and Ammunition Regulation Act.
Subay niini, gipasalig sa ZSBPPO nga ipadayon ug palig-onon ang presensya sa kapulisan ug mga operasyon sa pagpatuman sa balaod aron malikayan ang mga kriminal nga kalihokan ug mapadayon ang kalinaw ug kahusay sa tibuok lalawigan sa Zamboanga Sibugay.
