Patay nang napalgan ang usa ka 38 anyos nga mag-uuma nga adunay samad sa tiyan ug liog sa daplin sa national highway sa Sitio Proper, Barangay Luhib, Lake Sebu, South Cotabato, alas-1 sa kaadlawon sa Oktubre 25, 2026.
Giila ang biktima nga si Simplicious Nalilin Funclara, minyo ug residente sa Barangay Talisay, Lake Sebu. Base sa report sa kapulisan, mitambong pa sa kapistahan sa Barangay Luhib ang biktima sa wala pa siya nakit-ang patay.
Sumala sa inisyal nga imbestigasyon, adunay samad sa tiyan nga posibleng gitusok ug samad sa liog nga posibleng gihiwa ang biktima. Nadiskobrehan ang patayng lawas sa daplin sa highway nga nagsul-ob og pula nga sando ug asul nga maong.
Gidala ang patayng lawas sa Collado Funeral Home sa Surallah, South Cotabato alang sa dugang nga pagsusi. Padayon ang imbestigasyon sa Lake Sebu Municipal Police Station aron mailhan ang responsable sa krimen ug matino ang hinungdan sa pagpatay.
