Nasikop sa gipahigayong drug buy-bust operation sa kapulisan ang usa ka 37-anyos nga lalaki nga giila sa alyas Jephone sa alas 1:15 sa kadlawon, Dominggo, Oktubre 25, 2026, sa Balite Street, Purok 5, Barangay Poblacion, Bayugan City. Ang dinakpan, nga adunay live-in partner ug residente sa Curbada, Purok 19, Barangay Poblacion, maoy target sa operasyon nga gilusad sa Bayugan City Police Station.
Narekober gikan sa suspek ang duha ka pakete sa gituohang shabu nga mitimbang og 0.21 gramos ug adunay gibanabanang market value nga ₱1,428.00.
Nakuha usab sa operasyon ang usa ka cellphone, ₱500 nga gigamit isip buy-bust money, ug usa ka giabangang Bao-bao nga nga adunay plakang 493 Zulo Quebec Papa, nga giingong gigamit sa suspek atol sa maong transaksiyon.
Gipangulohan ang operasyon ni Deputy Chief of Police Police Major Kristopher Niel Nono, ubos sa pagdumala ni PLTCOL Joseph Carlo V. Silang, hepe sa Bayugan City Police Station.
Sa pagkakaron, anaa na sa kustodiya sa Bayugan City Police Station ang dinakpan alang sa hustong disposisyon. Gilauman nga atubangon sa suspek ang kasong paglapas sa Republic Act No. 9165 o ang Comprehensive Dangerous Drugs Act of 2002.
Photo courtesy: PNP Bayugan
