Nanguna ang Department of Education (DepEd) Tagum City Division sa pagpahigayon og mangrove o bakhaw planting activity niadtong Oktubre 24, 2026, sa Hijo Resorts, Barangay Madaum, Tagum City, isip kabahin sa pagpalig-on sa proteksyon sa baybayon batok sa epekto sa climate change ug mga kalamidad.
Miapil sa kalihokan ang mga Disaster Risk Reduction and Management Service (DRRMS) focal persons gikan sa DepEd Regional Office XI ug Central Office, uban sa mga partner gikan sa Hijo Resorts Tagum.
Tumong niini nga mapalambo ang pagpanalipod sa kalikupan ug mapalig-on ang kahandam sa mga komunidad sa baybayon. Gawas sa pagpangtanom, gibisita usab sa mga partisipante ang Forest of Hijo, usa ka conservation area nga puy-anan sa nagkalainlaing ihalas nga mga mananap, lakip ang Philippine long-tailed macaques.
Gipasiugda niini ang kamahinungdanon sa pagpreserbar sa kalasangan ug pagpanalipod sa biodiversity. Dako ang papel sa mga bakhaw sa pagpamenos sa coastal erosion, pagpaluya sa kusog sa storm surge, ug paghatag og puy-anan sa mga organismo sa dagat. Pinaagi sa maong inisyatibo, gipalig-on sa DepEd Tagum City ug sa mga kauban niini ang paningkamot alang sa mas luwas, lunhaw ug malungtarong komunidad.
Photo Courtesy: DepEd Tagum
