Gipasidan-an sa Davao Light and Power Company (DLPC) sa Davao del Norte ang publiko batok sa mga ilegal nga koneksyon sa kuryente tungod sa dakong peligro nga mahimo niini sa kinabuhi, kabtangan ug kaluwasan sa tibuok komunidad.
Lakip sa mga ilegal nga pamaagi ang direktang pagkonektar sa linya sa kuryente nga walay pagtugot, pag-bypass sa metro ug pag-usab o paghilabot sa metro aron malikayan ang hustong pagsukod sa konsumo sa elektrisidad.
Matod sa pahimangno, ang maong mga ilegal nga koneksyon mahimong hinungdan sa sobrang kainit sa mga alambre ug posibleng sunog, ingon man ang walay hustong proteksyon. Mahimo usab kini nga hinungdan sa sobrang karga sa mga transformer nga posibleng mosangpot sa pagkawala sa suplay sa kuryente sa mga kabalayan ug negosyo.
Giawhag sa Davao Light DavNor ang publiko nga ireport ang mga gidudahang pagpangawat o ilegal nga paggamit sa kuryente. Gihangyo sa kompanya ang kooperasyon sa komunidad pinaagi sa pagreport sa mga ilegal nga koneksyon aron malikayan ang mga aksidente ug mapanalipdan ang kinabuhi ug kabtangan sa publiko.
Photo Courtesy: DLPC
