Ipatuman sa syudad sa Tagum ang pagsira sa pipila ka kadalanan ug pagpatuman sa alternatibong mga agianan o rerouting gikan Oktubre 31 hangtod Nobyembre 2, 2026, isip pagpangandam sa pagsaulog sa Undas 2026.
Sumala sa pahibalo sa Tagum City Traffic Management Unit, ang maong lakang nagtumong sa pagpadayon sa hapsay nga dagan sa trapiko ug pagsiguro sa kaluwasan sa publiko atol sa pagdagsa sa mga tawo nga mobisita sa mga sementeryo aron sa paghinumdom sa ilang mga minahal nga mitaliwan na sa laing kalibutan.
Giawhag ang mga motorista ug mga bisita sa sementeryo nga mosunod sa gitakdang mga alternatibong agianan, mga karatula sa trapiko, ug mga instruksyon sa mga awtoridad aron malikayan ang kahuot sa kadalanan ug malikayan usab ang posibleng mga disgrasya.
Gipahinumdoman usab ang katawhan nga magmatngon sa pagbiyahe ug makigtambayayong sa mga traffic enforcer aron masiguro ang malinawon, hapsay ug luwas nga pag-obserbar sa kalag-kalag.
Photo Courtesy: Tagum City Economic Enterprises Office
