Nakig-alayon ang Department of Education (DEPED) Region 9 sa National Police Commission (NAPOLCOM) Region 9 pinaagi sa pagpirma sa Memorandum of Agreement (MOA) nga gihimo ning bag-ohay lang.
Matud ni DEPED-9 Regional Director Ronelo Al. Firmo, bag-ohay lang usab gihimo ang MOA Signing tali Philippine National Police ug DEPED-9 aron mapalig-on ang seguridad sa mga eskwelahan sa Zamboanga Peninsula Region.
Tumong sa maong kasabutan nga mapahugtan ang mga lakang sa seguridad ug mapalambo ang koordinasyon tali sa sektor sa edukasyon ug mga ahensya nga responsable sa pagpatuman sa kalinaw ug kahapsay.
Gisiguro usab sa DEPED-9 nga wala nay mamahimong violent incident sulod sa eskwelaha basta aduna lay panagtinabangay tali sa lain-laing mga sektor sa katilingban.
Pinaagi niini, gilauman nga mas mapanalipdan ang mga estudyante, magtutudlo ug uban pang kawani batok sa posibleng hulga ug insidente sulod sa mga kampus.
