Gidakop sa mga operatiba sa Isabel Municipal Police Station (MPS) ang giilang Top 1 Municipal-Level Most Wanted Person sa lungsod sa Isabel, Leyte, tungod sa kasong homicide atol sa manhunt operation sa Barangay Sto. Niño, Isabel, Leyte, niadtong nakalabay nga adlaw.
Ang operasyon gipahigayon ubos sa pagdumala ni PLT Sergio M. Llaneta III, Officer-in-Charge sa Isabel MPS, sa pagpangulo ni PCOL Celerino M. Sacro Jr., Provincial Director sa Leyte Police Provincial Office (LPPO).
Giila ang nadakpan nga alyas “Raffy,” 18 anyos, usa ka construction worker ug residente sa Barangay San Roque, Isabel, Leyte. Gidakop siya pinasikad sa warrant of arrest tungod sa giingong paglapas sa Article 249 sa Revised Penal Code o homicide, diin gitakda ang piyansa sa ₱120,000.
Gipahibalo ang nadakpan sa hinungdan ug kinaiya sa iyang pagdakop, lakip ang iyang mga katungod ubos sa Konstitusyon, gamit ang pinulongang iyang nasabtan. Sa pagkakaron, anaa siya sa kustodiya sa Isabel MPS samtang gihulat ang iyang pagtugyan ngadto sa korte nga nag-isyu sa warrant alang sa hustong disposisyon sa kaso.
Photo courtesy: PNP LPPO
