Imbis mopaldo, pildero ang duha ka indibidwal nga giila sa alyas “Makoy,” 42 anyos, ug alyas “Kapong,” 42 anyos, mga minyo nga mananagat ug residente sa Barangay Antipolo, Albuera, Leyte human sila gidakop sa kapulisan tungod sa giingong pag-apil sa ilegal nga tupada atol sa operasyon batok sa ilegal nga sugal didto sa naasoy nga lugar, niadtong Oktubre 24, 2026.
Ang operasyon gipahigayon sa Albuera Municipal Police Station (MPS), ubos sa pagpangulo ni PMAJ Emiliano M. Camama, ACOP, sa pagdumala ni PCOL Celerino M. Sacro Jr., Provincial Director sa Leyte Police Provincial Office (LPPO).
Ang ubang mga partisipante gikataho nga nangikyas sa nagkadaiyang direksiyon sa dihang namatikdan ang pag-abot sa mga pulis. Narekober sa operasyon ang duha ka patay nga pangsabong nga manok, duha ka hait nga butang nga gitawag og buwang, mga gamit sa tupada, ug kuwarta nga pusta. Ang nadakpan ug mga nakumpiskang ebidensiya gidala sa Albuera MPS alang sa hustong dokumentasyon ug dugang nga proseso sa kapulisan.
Ang duha ka gidakop mag-atubang sa posibleng paglapas sa Presidential Decree No. 449 o Cockfighting Law of 1974, nga nag-regulate sa mga kalihokan sa sabong ug nagdili sa mga ilegal nga kalihokan nga supak sa balaod. Ang dugang nga mga lakang pagahimoon subay sa hustong legal nga proseso.
Photo courtesy: PNP LPPO
