Misalmot ang mga nagtinguha nga mahimong boxing coaches ug referee-judges gikan sa nagkadaiyang siyudad ug lungsod sa Eastern Visayas o Region VIII sa Referee-Judges and Coaches Seminar nga gipahigayon sa Ormoc City Boxing Gym ug Ormoc City Champions’ Dormitory niadtong Oktubre 24–25, 2026.
Giorganisar ang maong kalihokan sa Lokal nga Kagamhanan sa Ormoc City, sa pakigtambayayong sa Association of Boxing Alliance of the Philippines (ABAP), aron mapalambo ang kahibalo ug kahanas sa mga partisipante, mapalig-on ang mga sumbanan sa pagtudlo ug paghusay sa mga sangka sa boksing, ug mapauswag ang maong isport sa rehiyon.
Gipangunahan ang seminar sa mga eksperto gikan sa ABAP, lakip sila ni Presidente Jan Marcus Manalo, Secretary General Sebastian Ripoll, Administrative Officer Elisse Boo, National Coaches Donald Walter Abnett ug Patricio Gaspi, ug International Referee-Judge Jonathan Jimenez. Gilaoman nga makatabang ang maong pagbansay sa pagpausbaw sa kalidad sa coaching ug officiating, ug sa pagpalambo sa mga talento sa boksing sa Eastern Visayas.
Photo courtesy: City Goverment of Ormoc
