Magpatuman matag bulan ang Social Security System (SSS) Ormoc Branch sa Run After Contribution Evaders (RACE) Program sa mga lugar nga sakop sa ilang hurisdiksyon aron mapalig-on ang pagsunod sa mga employer sa ilang obligasyon sa pagremit sa kontribusyon sa mga empleyado.
Gibutyag kini ni SSS Ormoc Branch Acting Head Roselyn Pilapil, kinsa mipasabot sa kamahinungdanon sa maong programa sa pagsiguro nga matuman sa mga employer ang ilang mga obligasyon ubos sa SSS.
Pinaagi sa RACE Program, gitumong sa SSS nga mailhan ug mapanubag ang mga employer nga napakyas sa pagremit sa kontribusyon sa ilang mga empleyado subay sa gitakdang mga regulasyon.
Gipasiugda usab ni Pilapil nga importante ang tukmang pagremit sa kontribusyon aron mapanalipdan ang katungod sa mga miyembro ug masiguro ang ilang pagkaangay sa mga benepisyo ug serbisyo sa SSS.
