Gimandoan sa Philippine Amusement and Gaming Corporation (PAGCOR) ang tanang gaming operators sa nasud nga ilisan ang ilang kasamtangang responsible gaming ads ug ipasiugda ang bag-ong 24/7 National Problem Gambling Helpline (NPGH).
Ubos sa memorandum nga giisyu niadtong Hunyo 9, ang tanang licensees, suppliers, ug gaming operators gikinahanglan mag-ilis sa ilang mga advertisement sa billboards, digital displays, ug uban pang outdoor ads ngadto sa NPGH campaign materials.
Matod ni PAGCOR Chairman Alejandro Tengco, tumong niini aron mapahimangnuan ang publiko kabahin sa responsible gaming, ug paghatag dayon og tabang ug suporta sa mga indibidwal nga naapektuhan sa problema sa sugal.
Ang deadline sa pag-ilis sa mga ads gitakda sugod niadtong Hulyo 15, 2026, ug kinahanglan kini magpabilin hangtod Septiyembre 15, 2026.
Ang National Problem Gambling Helpline (NPGH), naglihok isip 24/7 hotline nga naghatag og confidential counseling ug suporta pinaagi sa trained para-counselors ug mental health professionals.
COURTESY: PHILIPPINE NEWS AGENCY
