Nakadawat og tabang pinansiyal gikan sa kagamhanan sa Dakbayan sa Sugbo kagahapong adlawa, Hunyo 16 ang niabot sa 102 ka mga indibidwal nga nabiktima sa sunog sa Sitio Filter Site, Mohon II-G, Barangay Tisa, Dakbayan sa Sugbo.
Gipahigayon ang maong pagpang-apod-apod sa Legislative Lobby sa Cebu City Hall. Gipangulohan ug personal nga gitunol ni Cebu City Mayor Nestor Archival kauban ni Department of Social Welfare and Services (DSWS) head Portia Basmayor ang maong tabang pinansiyal.
Nipahimangno si Mayor Archival, ngadto sa mga benepisyaryo nga gamiton ang maong tabang alang sa ilang nag-una nga panginahanglanon isip tabang sa ilang mga pamilya nga makabangon pag-usab gikan sa maong insidente.
Ubos sa assistance program sa dakbayan, ang mga panimalay nga totally or partially damaged makadawat og tag P20,000 ang matag usa. Ang mga renters ug shares nakadawat sab og P10,000 samtang ang mga lodgers ug absentee homeowners gihatagan sab og tag P5,000.
Sa wala pa ang pagpang-apod-apod sa tabang pinansiyal, una na nga nanghatag og mga materyales ang kagamhanan sa mga naapektuhan nga mga pamilya alang sa pagsuporta sa ilang pagbangon pag-usab.
Photo courtesy: Cebu City News
