Gipakusgan pa sa Bureau of Fire Protection (BFP) ang gihimong Rural Search, Rescue, and Retrieval operations sa Glan, Sarangani, Mindanao, human sa niaging magnitude 7.8 nga linog niadtong Hunyo 8.
Aron masiguro ang paspas nga pagtabang, naghiusa ug nagtinabangay ang mga responders gikan sa BFP Regions 10, 11, 12, BARMM, ug CARAGA nga gi-deploy sa nagkalain-laing barangay ug sitio sa maong lungsod. Bisan pa man niini, dako ang nahimong babag sa operasyon tungod sa lisod nga kondisyon sa terreno, lakip na ang mga guba nga dalan, pagdahili sa yuta (landslides), ug kalayo sa kabukiran nga naghatag ug dakong kalisod sa access sa mga rescue teams.
Tungod niini, napugos ang mga responders sa paglakaw ug pagbaklay og pila ka kilometro aron lang maabot ang pipila ka mga isolated nga komunidad, samtang dugang kakuyaw usab ang dala sa kusog nga aftershock nga magnitude 5.5 nga miigo sa Glan niadtong Lunes sa gabii.
Luyo niining mga hagit, gipahayag ni BFP Officer-in-Charge FCSUPT Wilberto Rico Neil A. Kwan Tiu nga nagpabilin nga lig-on ang ilang pwersa sa ground ug padayon nga gigamit ang tanang kagamitan aron maseguro ang epektibong pagtabang sa mga apektadong residente.
Gidugang pa niya nga andam ang BFP sa dugang deployment kung gikinahanglan aron maseguro nga maabot ang tanan nga nanginahanglan og tabang.
