Gihukman sa Oslo District Court si Marius Borg Høiby stepson ni Crown Prince Haakon sa Norway og upat ka tuig nga pagkapriso human mapamatud-ang sad-an sa mga kasong rape, domestic violence, ug uban pang kriminal nga kalapasan.
Sumala sa desisyon sa korte, napamatud-an nga guilty si Høiby sa 34 sa 40 ka kasong gisang-at batok kaniya, lakip ang duha ka kaso sa rape, mga insidente sa pagpangulata sa iyang kanhing uyab, pagpanag-iya ug pag-apod-apod sa ilegal nga droga, ug paglapas sa restraining orders. Bisan pa niini, giabsuwelto siya sa duha ka laing kaso sa rape.
Sa panahon sa paglilitis, gipresentar ang nagkadaiyang ebidensya sama sa electronic messages, video recordings, ug mga testimonya nga naglambigit kaniya sa paggamit og droga ug dili maayo nga pamatasan. Samtang usa sa mga kasong rape giingong nahitabo sa basement sa pinuy-anan ni Haakon.
Bisan wala siyay opisyal nga titulo o katungdanan sa royal family sa Norway, ang maong kaso nakahatag og dakong kontrobersiya ug nakaapekto sa imahe sa Norwegian royal family.
Photo courtesy: Nieuwsblad
