Nanawagan ang Estados Unidos sa gobyerno sa Nicaragua nga buhian ang nakapriso nga lider sa Miskito Indigenous group nga si Brooklyn Rivera, human gipakita sa mga opisyal nga siya karon anaa sa kritikal nga kahimtang sa ospital.
Si Rivera, usa ka dugay nang kritiko sa gobyerno ni Daniel Ortega, napriso sukad Septyembre 29, 2023, ug giingong may kalabutan sa kampanya sa pagpanumpo batok sa mga oposisyon sa nasud. Matod sa iyang pamilya, politikal ang rason sa iyang pagkadetinido ug wala pay klarong kaso nga gipakita batok kaniya.
Gipagawas sa gobyerno sa Nicaragua ang mga litrato nga nagpakita kang Rivera nga hugot nga nagkadaut ang kahimtang, konektado sa mechanical ventilator ug nag-antus sa multiple organ failure, sumala sa ilang report.
Sa usa ka pahayag, gikondena sa US Bureau of Western Hemisphere Affairs ang padayong pagpang-aresto sa mga politikal nga bilanggong ug giingong “makalilisang ug dili tawhanon” ang maong sitwasyon. Giisa usab nila ang panawagan sa “walay kondisyon nga pagbuhi” kang Rivera ug sa ubang political prisoners sa Nicaragua.
Samtang, ang mga Indigenous group sa Nicaragua miingon nga si Rivera gi-detain nga walay hustong proseso ug giakusahan ang administrasyong Ortega-Murillo sa paglapas sa tawhanong katungod.
Gibanabana sa mga grupo nga adunay ubay-ubay pa ka political prisoners sa nasud, samtang padayon ang kontrobersiya sa gobyerno batok sa mga kritiko niini sulod sa miaging mga tuig.
Photo Courtesy: Manila Times
