Gipahibalo sa Philippine Atmospheric, Geophysical and Astronomical Services Administration (PAGASA) nga misugod na ang panahon sa habagat o southwest monsoon sa nasud, nga gilauman nga magdala og mas kanunay nga pag-ulan sa nagkadaiyang bahin sa Pilipinas niining mga mosunod nga adlaw.
Matod sa PAGASA, ang pagpalig-on sa habagat nalambigit sa pag-uswag sa Severe Tropical Storm “Domeng” nga nagpadayon sa paglihok ibabaw sa Philippine Sea. Ang pagsulod sa habagatang hangin ug ang kasamtangang kahimtang sa panahon maoy mga timailhan sa opisyal nga pagsugod sa habagat ug sa umaabot nga ting-ulan.
Busa, gipasidan-an sa weather bureau ang publiko nga mag-andam sa posibleng mga pag-ulan, pagbaha ug pagdahili sa mga lugar nga delikado niini, ilabina kon magpadayon ang kusog nga ulan.
Sa ulahing monitoring sa PAGASA, si “Domeng” nagpabiling layo sa kalupaan ug wala pay gibayaw nga tropical cyclone wind signal sa bisan unsang bahin sa nasud.
Giawhag usab ang publiko nga padayon nga magmonitor sa mga weather advisory ug updates gikan sa PAGASA aron malikayan ang posibleng peligro nga dala sa nagkagrabeng kahimtang sa panahon.
Photo Courtesy: Philippine News Agency
