Stable na ang kahimtang sa usa ka babayeng hiker nga nahulog gikan sa gibana-bana nga 30 metros nga kahabogon sa White Sand area sa Mt. Apo niadtong Mayo 30. Ang biktima nailhang si Glaiza Prencipe, 37-anyos, ug residente sa Quezon City.
Sumala sa City Disaster Risk Reduction and Management Office (CDRRMO) Digos, nadawat nila ang report bandang alas-9 sa buntag gikan sa personnel sa DENR Kapatagan mahitungod sa insidente. Gituohang mitongtong ang biktima sa usa ka bato nga kalit mibigay, hinungdan sa iyang pagkahulog sa pangpang.
Dali nga mitubag ang CDRRMO Digos uban sa BFP Special Rescue Force aron tabangan ug luwason ang biktima.
Pinaagi sa koordinasyon sa City Government of Digos ubos sa liderato ni Mayor Josef F. Cagas ug sa LGU Sta. Cruz pinaagi sa MDRRMO Sta. Cruz, malampusong nadala ang biktima ngadto sa Digos Doctors Hospital pinaagi sa Digos trail aron mapaspas ang rescue operation.
Gikompirma sa mga otoridad nga naabot sa ospital ang biktima bandang alas-12:45 sa kaadlawon sa Mayo 31 ug anaa na kini sa stable nga kondisyon samtang nagpadayon sa pagpaayo.
Padayon usab nga gipahinumdoman sa mga otoridad ang mga mountaineer ug turista nga magmatngon sa ilang paglihok atol sa pagsaka sa kabukiran aron malikayan ang susamang mga insidente.
