Gipaubos sa Energy Regulatory Commission (ERC) ang pinakataas nga kapasidad sa kuryente nga mahimong operahon sa matag power generation company sa tibuok nasod alang sa 2026. Ubos sa bag-ong limitasyon, dili tugotan ang bisan unsang kompanya nga molapas sa 7.05 gigawatts nga installed generating capacity sa national grid.
Sumala sa ERC, ang kinatibuk-ang installed generating capacity sa nasod karong tuiga mao ang 28,197.05 megawatts, nga gamay nga ubos kumpara sa miaging tuig. Gibahin kini sa 20,422.8 MW alang sa Luzon, 3,478.3 MW sa Visayas, ug 4,295.9 MW sa Mindanao. Pinaagi niini, gipugngan ang mga kompanya nga makakuha og dako kaayong bahin sa merkado sa enerhiya.
Giingon sa ERC nga ang maong limitasyon makatabang sa pagmintinar sa patas nga kompetisyon sa industriya ug mas epektibong pagplano sa sektor sa enerhiya. Matod ni ERC Chair Francis Saturnino Juan, importante usab kini aron masubay pag-ayo ang pagdaghan sa renewable energy facilities ug battery energy storage systems sa nasod.
Photo Courtesy: Rappler
