Gipahibalo sa Philippine Institute of Volcanology and Seismology (PHIVOLCS) ang posibilidad sa pagpataas sa Alert Level 3 sa Bulkang Kanlaon sa mosunod nga mga adlaw.
Kini tungod sa naobserbahan nga “crater glow” o banaag sa baba sa bulkan niadtong Mayo 10 nga nagpadayon ug nagkakusog hangtod karon.
Sumala sa (PHIVOLCS), ang maong banaag usa ka indikasyon nga ang magma hapit na mogawas sa ibabaw, nga mahimong moresulta sa mas kusog ug peligrosong pagbuto.
Sukad pa niadtong Nobyembre 2024, mabinantayong ginasusi sa PHIVOLCS ang bulkan gamit ang infra-red cameras, apan karon lamang unang higayon nga nakita ang pagsiga sa kinatumyan niini tungod sa superheated volcanic gas.
Matod sa mga state volcanologist, ang crater glow kasagaran mao ang sinugdanan sa usa ka “magmatic eruption.”
Sa pagkakaron, hugot nga gidili ang pagsulod sa 4-kilometer radius Permanent Danger Zone (PDZ) aron malikayan ang peligro sa kalit nga pagbuto, pag-ulan sa abo, ug ang makamatay nga pyroclastic density currents o uson.
Photo Courtesy: PHIVOLCS
