Nakasinati og pagsaka sa presyo sa mga paliton ug serbisyo ang rehiyon sa Eastern Visayas human mitala og 8.5 porsiyento nga inflation rate alang sa bulan sa Abril.
Subay sa report nga gipagawas sa Philippine Statistics Authority (PSA) Region VIII niadtong Lunes, Mayo 11, kini nga datos hapit nidoble itandi sa 4.8 porsiyento nga natala niadtong Marso. Giila usab kini nga labing taas nga inflation rate kon itandi sa susamang bulan sa miaging tuig.
Sa gipahigayong pag-analisar sa matag probinsya, ang Samar ang nakatala sa labing taas nga inflation sa tibuok rehiyon nga miabot sa 13.5%. Gisundan kini sa Biliran (10.7%), Eastern Samar (9.0%), Northern Samar (8.7%), Southern Leyte (8.2%), ug Leyte (6.5%).
Samtang, ang Dakbayan sa Tacloban ang mitala sa labing ubos nga porsiyento nga anaa lang sa 5.9%.
Gipahayag sa PSA nga ang nag-unang rason niini nga pagsaka mao ang sektor sa transportasyon nga misaka ngadto sa 26.4% gikan sa 9.4% niadtong Marso. Resulta kini sa sunod-sunod nga usbaw sa presyo sa gasolina ug uban pang produkto sa petrolyo.
Sa Dakbayan sa Tacloban, mitaas usab ngadto sa 19.7% ang inflation sa transportasyon, samtang ang mga batakang kinahanglanon sama sa pagkaon ug mga ilimnon nga dili makahubog misaka og 6.0%.
Dako ang nahimong epekto niini nga krisis sa mga pamilya nga anaa sa lower income households. Natala nga miabot sa 9.2% ang inflation alang sa mga kabos. Usa sa mga nag-unang hinungdan niini mao ang pagmahal sa presyo sa bugas nga misaka ngadto sa 13.8% gikan sa 6.2% sa miaging bulan.
Gilauman nga magpadayon ang hugot nga pag-monitor sa kagamhanan sa presyo sa mga baligya aron mamenosan ang kalisod nga giatubang sa mga lumulupyo sa Eastern Visayas.
Photo Courtesy: Philippine Star
