Maglunsad og seat sale ang Philippine Airlines o PAL alang sa mga pasahero nga gustong makatagamtam og mas komportable nga biyahe pinaagi sa Business Class ug Premium Economy. Gipahibalo sa nasangpit nga airline nga ipagawas ang mga pamasahe ug mga rutang apil sa promosyon sa pagsugod niini karong Oktubre 19.
Sa Business Class, ang mga pasahero sa piniling mga biyahe makatagamtam og lingkoranan nga mahimong higdaanan aron mas komportable ang ilang pagpahulay, lakip na ang mga pribilehiyo nga anaa usab sa Premium Economy. Gilaoman nga makatabang kini sa mga biyahero nga nangita og mas komportable nga kasinatian atol sa ilang pagbiyahe.
Samtang, nagpadayon usab ang PAL sa pagpalambo sa ilang long-haul flight services. Niadtong Hulyo, mipirma ang kompanya og Memorandum of Understanding uban sa Boeing alang sa posibleng pagpalit og hangtod 20 ka 787-10 Dreamliner nga mga eroplano. Nagpalit usab kini og bag-ong Rolls-Royce nga mga makina alang sa siyam ka long-haul nga eroplano gikan sa Airbus. Gilaoman nga ang maong mga lakang makatabang sa pagpalambo sa serbisyo ug kaharuhay sa mga pasahero.
Photo courtesy: Trading View
