Patay ang lima ka indibidwal, lakip ang duha ka security guard, human gibuhi-an sa rebeldeng Houthi ang lima ka missile nga miigo sa presidential palace complex sa siyudad sa Aden, sa habagatang bahin sa Yemen, niadtong Huwebes.
Sumala kang Information Minister Moammar al-Eryani, luwas ug wala nasamdan ang prime minister ug ang mga miyembro sa gabinete sa Yemen nga didto niadtong higayona sulod sa Maashiq Presidential Palace. Samtang, matod sa tigpamaba sa militar sa Houthi nga si Yahya Saree, kabahin kini sa ilang polisiya nga puntiryahon ang mga pasilidad sa militar sa Saudi Arabia bisan asa kini makit-an.
Gipahibalo usab sa Saba News Agency, nga gipadagan sa Houthi, nga ang ilang target ang hedkuwarter sa mga operasyon militar sa mga opisyal sa Saudi Arabia ug ang bodega sa mga armas sulod sa compound. Sumala sa mga nakasaksi, nadungog ang kusog nga mga pagbuto sa palibot sa palasyo. Human sa pag-atake, gipadayon sa mga awtoridad ang hugot nga pagbantay sa seguridad sa tibuok rehiyon tungod sa kabalaka sa posibleng dugang nga pag-atake.
Photo courtesy: BBC
