Gipahibalo ni Presidente Ferdinand “Bongbong” Marcos Jr. niadtong Biyernes nga ipatawag niya si Chinese Ambassador Jing Quan aron hisgotan ang kontrobersyal nga pahayag niini bahin sa posibleng paggamit og puwersa batok sa Pilipinas. Matud sa Presidente, ang gisulti sa embahador daw usa ka hulga — dili angay sa usa ka diplomatiko.
Una niining miingon si Jing Quan nga dali rang modaog ang China kon mopili kini sa paggamit og puwersa, apan gipasiugda usab niya nga dili kini buhaton tungod kay gusto sa China ang kalinaw. Kini nga pahayag nahitabo human gitawag ni Defense Secretary Gilberto Teodoro ang China nga tigpahinabo og kagubot sa rehiyon.
Agig tubag, gisaway sa Department of Foreign Affairs (DFA) ang pahayag sa embahador, nga nagkanayon nga dili kini makatabang sa komplikado nang relasyon sa duha ka nasod.
Padayon ang tensiyon tali sa Pilipinas ug China tungod sa nagkasumpaking pag-angkon sa South China Sea. Bisan adunay internasyonal nga desisyon nga walay ligal nga basihan ang halapad nga pag-angkon sa China, nagpadayon gihapon ang komprontasyon nga usahay moresulta sa bangga sa mga barko. Gilaoman nga ang panag-istorya makatabang sa pagpatin-aw sa isyu ug malikayan ang dugang pagtaas sa tensiyon.
Photo courtesy: Philippine Information Agency
