Posibleng mohinay sa pagtubo ang ekonomiya sa Pilipinas ug motaas ang inflation tungod sa gipaabot nga grabeng epekto sa El Niño nga makadaot sa produksyon sa humay ug uban pang produktong pang-agrikultura.
Base sa taho ni John Paolo R. Rivera senior research fellow sa PIDS – Philippine Institute for Development Studies niadtong Oktubre 15, 2026, ang maong hulga sa hulaw posibleng makadugang og hangtod 1.57 percentage points sa headline inflation ug makapakunhod og 0.81 percentage points sa pagtubo sa Gross Domestic Product (GDP) sa nasod.
Ang kakulang sa ulan ug tubig alang sa irigasyon maoy nag-unang hinungdan nga makaapekto sa produksyon sa humay, mais, ug mga utanon, diin moresulta sa pagmahal sa presyo sa pagkaon ug dugang presyur sa suplay sa kuryente tungod sa kakuwang sa tubig para sa hydropower. Gilaoman nga mosamot pa ang kakusgon sa El Niño sa kataposang bahin sa 2026 ug magpadayon hangtod sa unang katunga sa 2027. Bisan pa man niini, magdepende gihapon ang aktuwal nga epekto sa inflation sa lokal nga produksyon, presyo sa imported nga bugas, ug ang abilidad sa kagamhanan sa pagsiguro sa suplay sa pagkaon.
Photo courtesy: Optic Politics
