Nagpabilin nga mas taas ang trust ug approval ratings ni Vice President Sara Duterte batok kang Presidenti Ferdinand Marcos Jr., bisan pa man sa gamay nga pag-ubos sa iyang mga marka base sa pinakabag-ong survey sa Pulse Asia nga gipahigayon niadtong Setyembre 17 hangtod 24, 2026.
Nakakuha si Duterte og 54 porsiyentong approval rating ug 55 porsiyentong trust rating, diin bisan pa sa pag-ubos og duha hangtod tulo ka percentage points, nagpabilin gihapon siyang nag-inusarang opisyal nga gisaligan sa mayoriya sa mga Pilipino.
Sa laing bahin, nakakuha lamang si Presidenti Marcos og 30 porsiyentong approval rating ug 28 porsiyentong trust rating. Sumala sa Pulse Asia, nagpabilin ang “small majorities” nga suporta alang sa Bise Presidente, samtang halos tunga sa mga respondent ang nagpakita og kritikal nga pagtan-aw ug kawalay-pagsalig sa liderato sa Presidente. Mitala si Duterte og pinakataas nga trust rating sa Mindanao nga miabot sa 94 porsiyento ug Class E nga may 69 porsiyento, samtang si Marcos nakakuha sa iyang pinakataas nga trust rating sa Balance Luzon sa 43 porsiyento. Ang maong nationwide survey gipahigayon pinaagi sa face-to-face interviews sa 2,400 ka respondents.
Photo courtesy:Tsek.ph
